سرقات قلبي ومالي

العشرة د الصباح هادي ، فاق خونا عبد الهادي ، لا خدمة ولا ردمة ، السما زرقا ولا مظلمة ...بحال بحال ، الحياة غادية كيفما كان الحال ، فطر بالزبدة والعسل ، وحياتو قطران... مشط وتفركس وغسل ، على عينين الجيران...
لبس سبرديلتو البيضا وطلع للطوبيس ، ناشط ماشط تقول هادا عريس ، عينيه يلمعو كي عيون الثعلب ، يشمشم والله واعلم علاش يقلّب... يشوف ويحقق فوجوه الناس ، جالس فمكانو ومافيها باس... ينوض مرة مرة ، اللي جاب الله ، بزطام ولا صرة ، بلاكبيري ولا أيفون ، نوكيا ولا سامسون(ج) ، المهم يطلع نهارو ، وتا واحد مايجيب خبارو ، والله يحفظ ايلا شدوه وخلاو دارو..... مابيه ما عليه ، شاف قدام عينيه ، ملاك فصورة انسان، خدودها كي ورود الريحان ، شعرها اشهب فالهوا طاير ، خلى عقلو حاير ، قرب ليها وبغى يتكلم ، لسانو خانو وبدا يتمتم ... شوية فكر وقال فراسو ، اللي شابع فلوس هادا زينو وهادا لباسو ، فكر يسرقها وياخذ قياسو... لكن قلبو ماطاوعوش ، زين الوجه والتبسيمة والفلوس اللي ماعندوش ، وضيق الحال اللي خلاه يسرق ، يطلع فالطوبيس ينشف ويعرق...
قرب منها وقال ، عبد الهادي اسميتي وسمعيني يا زينة الخال ، سلبتيني وبرموشك قتلتيني ، وقلبي يتركل بين اييك ، شوفي من حالي يرحم واليديك ، بغيتك تكوني لي خليلة ، لا ترفضيني ماقاد على تبهديلة ، شافت فيه شوفة طويلة ، وطولات فالشوف ، وجهو احمار وشعر بالخوف... شوية تبسمات وعيونها فعينيه ترسمات ، وقالت ملكتيني قبل مانسمع منك هضرة ، وخليتي قلبي شاعل كيف الجمرة ... عبد الهادي يا عبد الهادي ، سنين هادي ماتحرقت بنار الهوى كبادي... قرب لي يازين التبسيمة ، نعنقك عناق المّيمة ، نسيت ما قلت ليك اسميتي حليمة ، ويقولو لي أحلام ، أمنيتي تكون زوجي ونكون ليك المادام....ضماتو وعنقاتو ، وكانت احلى لحظة بين أوقاتو... وكتبت نمرتها فورقة وعطاتو
شوية شهقات وصرخات بشوية ، قالت ليه اسمعني يانور عينيةّ ، خويا راكب معانا فالطوبيس وماشفتو ، كان بين الناس وبربي ماعرفتو..... جرات بسرعة ونقزات من الباب ، تشاور ليه وتقول بسلامة يا اعز الاحباب ، تلافت وراه بان ليه راجل صحيح واقف حداه ، يخنزر فيه وباغي يهضر معاه، تخلع وخاف وقال هذا خوها شاف اللي شاف...الليلة يقتلني ولا يهرس لي الكتاف...قرب ليه الراجل و شد فيه وقال ، عييت مانشاور ليك ونغمزك يا قايد البغال ، قلب جيوبك مزيان ، راك تخوفشتي ماديتي ما جبتي وكان اللي كان.... شهق شهقة وقلب الجيب ، ضحك على راسو وبان فيه العيب...
.... سرقات قلبي ومالي ،تبهدلت وهذا حالي ... الهوى يعمي الشاطر ، يخليه لا صحة ولا مال حاير... واللي عشق الحبيب ، يصبر معاه ولو ركب فيه الشيب ، ودّا ليه ما فالجيب ...وايلا تقولب الشاطر هاداك جدّ العيب.....


0 التعليقات:

Twitter Delicious Facebook Digg Stumbleupon Favorites